श्रावण...

 

जुना रस्ता जुन्याच डोहात नवा पाउस मिसळुन गेला
यंदा श्रावण तुझ्याशिवाय एकटा एकटाच कोसळुन गेला
तुला पावसात शोधण्यासाठी रोज छत्री विसरुन आलो
रडेपर्यंत हसशील म्हणून जुन्याच चिखलात घसरुन आलो
चिखल म्हणाला, जुनाच दोस्त आज नव्यानं ढासळुन गेला
यंदा श्रावण तुझ्याशिवाय.....
सुसाट वारा उलटी छत्री कसलाच किस्सा घडला नाही
तुझा साधा रुमाल सुध्दा यंदा चिखलात पडला नाही
डोह म्हणाला, स्वच्छ रुमाल गढुळ पाण्यात विसळुन गेला
यंदा श्रावण तुझ्याशिवाय....
पावसाच्या भिंतीआड मोकळं मोकळं मंदीर नाही
चित्रपट पाहतानाही तुझ्या पायावर उंदीर नाही
माझे एकटे पाय बघुन, वेंधळा उंदीर गोंधळुन गेला
यंदा श्रावण तुझ्याशिवाय...
मागचा श्रावण पुढचा श्रावण भरून वाहतील जोडीने
एवढा एकच व्याकुळ होईल सखे तुझ्या ओढीनं
श्रावण म्हणाला, समजुन घे, एक डाव भुताला दिला
यंदा श्रावण तुझ्याशिवाय......